Anacos de nós

Convertamos o "Debería de ser" en "Intentemos facelo posible"

QUÉN SOMOS?

Un anaco e unha parte de algo. As persoas estamos cheas de anacos de vivencias, experiencias, emocións, coñecementos, habilidades, relacións, recordos… Por iso cada parte é fundamental para comprender e coidar o total.
Nós queremos darlle importancia a cada pequeno anaco de ti, construíndo e sumando desde a riqueza da diversidade.

anacos socioeducativos

…é unha empresa nada no 2014 en Vedra. Xorde co anaco dunha persoa formada no eido do Traballo Social e o tempo libre. Unha vez posta en marcha, aplícalle o plural, Anacos, coa suma de outras persoas con formación do ámbito educativo. Elaboramos proxectos socioeducativos e culturais coa finalidade de dinamizar a realidade sociocomunitaria e favorecer unha actitude integradora, creativa e lúdica, sementando con ela
valores baseados na inclusión e na igualdade.
En cada proxecto desenvolveremos obxectivos específicos, pero sempre mantendo unha liña común de intervención, que será determinante para o noso xeito de facer e creando con ela o noso selo de identidade.

A loita feminista acompañaranos en cada unha das nosas accións e forma de entender as diferentes realidades. Buscamos crear espazos libres de machismos e inclusivos ante todas as diversidades existentes.

Creemos no potencial da educación non formal como transmisora de valores e como ferramenta fundamental para a adquisición de habilidades sociais.

Temos un compromiso co noso patrimonio inmaterial. Coñecer o contexto é preciso para comprender a realidade, por iso queremos facer especial fincapé en coñecer as tradicións e manter a nosa lingua viva.

Queremos coidar o que nos rodea non atopando ningún motivo polo que non facelo e transmitindo a importancia de coidar espazos que nos dan vida.

Como te sentes é o noso prólogo. Temos moi claro que traballar a xestión de emocións é básico e para iso é necesario telas sempre presentes e aprender a identificalas, tanto as nosas como as das persoas coas que compartimos momentos.

quen o forma?

Anacos é un conxunto de persoas que comparten unha filosofía de vida e un xeito de facer no eido do tempo libre e a dinamización cultural. Persoas amantes do xogo como recurso, da cultura como parte do noso propio ser e da inclusión como palabra abandeirada. Medramos en cada proxecto e na actualidade esta equipa fórmana persoas con nome propio:

“Para min ANACOS é a miña creación máis valiosa. Un xeito e unha forma de vida. A satisfacción de poder executar proxectos de forma profesional que comparto totalmente co meu xeito de entender a nosa realidade. A satisfacción de poder irme a casa coa sensación de compartir un anaco de min con outras persoas."

“Para min anacos é poder camiñar sempre cara adiante sen medo a caer por moi fina que sexa a liña na que nos apoiamos e superando os medos cun sorriso na cara”

“Para min Anacos é un proxecto con alma, corazón e vida. En cada proxecto poñemos o mellor de cada unha de nós para incentivar e motivar as persoas coas que traballamos a construír un mundo respectuoso coas diferentes persoas e seres cos que cohabitamos. Imaxinar, pensar e crear para o benestar físico e emocional dende os máis cativos ata a terceira idade. Penso en Anacos e acoden lembranzas que me esbozan un gran sorriso e grandes aprendizaxes.”

"Para min Anacos representa futuro. É unha oportunidade de cambio, de mellora, de transformación social e persoal. Anacos é sororidade, compañerismo e compromiso. Un símil moi acertado sería como o de rememorar un recordo co cal te sentes segura, plena, orgullosa e feliz. Anacos é camiñar, proxectando ideais e perspectivas de vida diferentes pero válidas en todos os aspectos. Anacos é futuro, e o futuro sementase, coidase e ao final, sempre florece."

Anacos busca simbolizar a suma das partes dende o individual ata o colectivo.

Servizos

Contactanos!

Aviso legal | Declaración de accesibilidade | Termos e condicións